La Barcunata 10
Lu sabatu passatu
mi ntise tantu mali,
pecchissu già mi ficeru
visita generali.
Lu medicu-generico
mi disse: - Chi ti sente?
Eo rispundivi: -Mangiu,
però no’ vaju nente.
Sulu de tantu ‘ntantu,
scusati la crianza,
de iusu caciu l’aria,
chi tegno ntra la panza.
Chiju mi rispundiu:
-Pigghiati pe’ sciroppo
tri quarti e na gazzosa
e vi’ ca vai de corpo!
Nci disse all’otorinu:
-Li ricchji aju mbujati,
mi rumbanu e no’ sento
mancu lu cannunati.
E chistu mi rispunde:
- Fa tu la stessa cosa
chi disse li generico:
tri quarti e na gazzosa!
Poe jivi all’ortopedico,
ci disse: -Como fazzu?
Mi dole lu cutruzzu
e musciu aju stu vrazzu!
Lu medecu rispunde:
-Sparati quattro lampi,
li romatismi passanu
e novant’anni campi!
E l’analista poe
mi visitàu l’orina
-Va jettati nu litru,
però mu è de rocina!
Mi disse lu dentista:
-Li dente l’ài cariati,
e puru li gingivi
su troppo malandati!
Pecchissu m’ordinàu
li sciacqui de cuntinu
cu’ vintiquattro quarti
de calici de vinu!
Eo, quandu ntise chistu,
restai propio de sale:
diciti, duve pigghiu
li sorde pe’ sti male?
Tri quarti m’ordinàu
lu medeco genereco,
lu stesso l’otorinu
e quattro l’ortopedeco;
nu litru cunsigghiàu
lu medeco analista
e vintiquattro quarti
mi disse li dentista!
Amici, ntra nu jomo,
nu fustu nci nde vò:
a n’annu, no’ m’abbastanu
li vigni de Cirò.