La Barcunata 12
Si rocire chista testa
li pensere mi la fannu,
vegno ccà a sta barcunata,
viatu.. viatu sinde vannu.
Sin de vannu c’alla mente
si rivigghia lu passatu
quandu, ancora cotraschjuni,
ccà jocava spenseratu
cu l’amici de na vota
e compagni de la scola:
oh, quant’anni chi passaru
oh, lu tempu corno abbola!
Si, volau! ma lu presente
li valore cancellàu
de la vita, ca lu mundu
lu progresso traspormàu!
Si perdiu la Religione,
de “Deo Patre” lu concetto,
pè li propre genitore
nò c’è mancu cchiu rispetto!
Ma però non è cangiatu,
lu toe anticu panorama
spece quando “l’Aurora”
de culuri fa na trama!
E li “Rini” su li stesse
e li scogghie de Migghiote,
li Timpati, Giambaruni
cu li Squeje e li Vajote.
Su li stesse li paisi
alla vista siminati,
e chi parenu presepe
si su a notte illuminati!
Su li stesse l’olivari
de Trachì e Santamaria,
de la Cona e de Jannejo,
de Lorizzi e la Rangia!
Su li stesse arrede a Fazu
Criscenzc e a Grijuzzu
sutta l’Angri e a lu Marchisi
all’Oliva ed a Ntonuzzu.
È la stessa la canzuni
de lu hjumi de l’Abbati
chi, scurrendo verzo sutta,
fa li vaji ricamati.
Nò cangiàu mancu lu vosco
de Mercuriu e de Berregna
li Macchiole e la Jenestra
duve paci eterna regna!
E davanti a stu spettaculu
le meo core scoppia a chjantu
ca l’allegra cotraranza,
sinde jiu como nu ncantu!
Quando vinne ccà lu Rrè,
Ferdinandu de Burbuni,
de passaggiu a stu paisi
s’affacciàu de stu Barconi.
Restau como nu ncantatu,
quando vitte la marina,
lu Castejo, l’Asprumunti
E lu Strittu de Missina!
E cchiu fora, ancora, l’Etna
Chiju jorno chi scoppiava,
e lu Strumbuli luntanu,
supa mari, chi fumava!
E de fronte a stu meraculu,
chi Natura ni dunau,
Ferdinandu de Burbuni
daccussì si pronunziàu:
«Quantu, a tutta la Calabria
chistu è l’unicu Barcuni!
Nò c’è n’atru chi l’appatta
mu si fa nu paraguni!
Fortunati, o Nicolisi,
stu Barcuni è vantu e gloria!»
E lu dittu de lu Rrè
passau viatu ntra la storia.