La Barcunata 24
Quandu è sira d’ogni sàbatu,
chista giuventù vrusciata,
sinde va a la discuteca
pe’ mu passa la nottata.
E cu’ vade a sti locali
certo è lu vagabundu,
lu viziatu cotraschjuni
cchjù sbacatu de lu mundu!
Puru va la furracchiola
‘ncerca de na cugnuntura,
pe’ mu fa la cornicchjola
quando ‘ncappa l’abbentura!
E no’ manca la signura
pe’ mu ‘ncuntra la fortuna,
mu ci ‘ncrocca a lu maritu
de cornàmi na curuna!
Poe si jettanu a lu ballu!
Ma chi abbàllanu? S’annàcanu
e s’abbùttanu de droga
e d’arcolici si ‘mbriàcanu!
E la morte a na ripata
ammucciàta (la mariola!),
tesse lu ‘ngannacumpare
mu li pigghja a la tagghjola!
Quandu su’ li matinàti,
‘mbriachi e stanchi de ballare,
a la casa ognunu penza
mu si pote riposare.
Ma c’è cui ‘ncòccia a nu muru
e cui a n’àrvuru si mprappa,
cu’ va e pista a n’atra machina
e lu morto sempe scappa!
Ed’a menzo a stu munzejo
de lamère e de ruttàmi,
su li vittimi ‘mpittàti
chi de fora ànnu li ‘ntrami!
E a la casa c’è cui aspetta,
la tornata ognunu spera;
li capiji cui si sciuppa
e cui ciange e si dispera!
Pecchì su’ li discuteche,
spece pe’ li giuvenotte,
senza sale ‘ntra la testa,
sempe fràbbica de morte!
Cu’ la mente raggiunàti
Prima mu v’abbenturàti!