La Barcunata 27
‘N’cammara operatoria,
Cuncetta si torcìa
pe’ lu doluri forte;
però no’ parturìa!
Fora Nicolantone
ansiusu chi aspettava
de susu a jusu jendo,
nervusu passijava!
E nesce la ‘mpermera:
“Auguri: dui gimelle,
nu masculu e na fimmena,
veniti: oh chi su’ belle!”.
Appena chi trasìu,
restau ammarmuratu,
parzica can nu lampu
l’avìa furminatu!
“Mpatti dintra na culla,
lu poveru ‘mpilici
vitte dui criaturi
cchiù niggri de la pici.
‘Mpuriata la mugghiere:
“Vidi chi combinasti?
Eo ti dicìa: va’ làvati,
ma tu no’ ti lavasti:
venivi mu ti curchi
como nu carvunaru,
e lordo de fumère
pejo de nu porcaru!
Chistu è lu risultatu
e chisti sugnu li figghj
ccussì como li fice,
ccussì à mu ti li pigghj.
E mo’ chi à mu si fa?
Voe pe’ mu l’accettamu
oppuru a nu cafuni
fundu mu li jettamu?
Nicolantone allora
ringrazia lu Signuri
e cu delicatizza,
s’abbrazza li creturi
e accetta volentere
li corna forestere!