La Barcunata 11
Nu schjantu!.. N’atru schiantu
Dui corpi scuri a scasciu!
Dui scosse... dui sussurti!
Nu forte scatalasciu!
E poe, pe’ lu sderrupu,
‘ntronau nu rumbu cupu!
Si vitte na muntagna
De fumu c’accecava
E na carcara ardenta
De fiammi chi ‘chjanava
Sempe verzo lu celo,
tant’era lu spacelo!
Li genti, ‘ntra li turri,
si vitteru perduti,
cercavano nparu
ma vìnneru agghjuttuti
com’unda de lu mari
ti suca e poe scumpari!
Como quando Sansuni
‘mpittàu li Filisdei
o corno lu Vesuviu
curcàu tutta Pompei,
li Turri culassali
èpperu stu finali!
Ca tuttu stu judizziu,
vigliaccu ed assassinu,
li pacifisti tutti
dormìanu a sonno chjinu:
como dorme l’agghjru
lu verno, e no’ sentiru!
Però, quando a Kabbullu,
como nu mortaretto,
scoppiau la prima bumba
juntaru de lu letto;
scapparu verso Assisi
de tutti li paisi!
Fu fatta ccà na marcia,
na marcia silenziusa,
ch’è como hjumi mutu,
spissu periculusa:
tipu de lu Gi otto,
chi ci scappau lu morto!
Poe ficeru comizi
Cuntra li Mericani
Chi cu’ li ‘Ngrisi mossero
Guerra a li Talebani.
Gridaru: “Paci-Paci!”
No’ si parràu d’antraci!
No’ sulu, all’urtimata,
sti porci strafuttuti
dissero ca sti genti
bisogno ànnu d’ajuti,
pecchi li Talabani
Su puru esseri umani!
Perciò cu Bertinotto
‘ci mandu dui rigali:
lu casu e lu capuni,
pe’ jorno de Natali,
‘mbece cu Agnoletto
a pasqua, lu crapetto!