La Barcunata 8
No criditi a certe sindaci,
no criditi a cunsigghiere,
ca vi tiranu alla riti
cu li solite manere!
Si chist'annu a mia votati,
cari amici nicolisi,
vi assicuru ca a quattr’anni,
vi traspormo lu paisi!
No vi dugnu na fatiga,
cu la zzappa e lu sciamarru,
nommavisse si sudati,
mu vi pigghia lu catarru!
Vi promento, a sei cannali,
p’ogni ruga, na fontana:
alla Chiazza, a la Cutura,
a Tavigghia e a li Pontana;
a Doricu e alla Tripona,
alla Papa e ‘n’ Via Garcea,
dui ci vonno a la Rimisa
e poe n ‘atra a Cirolea!
La mentimu poe all’Abbati,
allu Schicciu e a Du Mari,
allu campu, duve jòcanu,
e a li casi Populari;
ci vò n’atra sutta a Stranu,
sutta l’Arcu e a lu Carusu,
alla Cona e a lu Santissimu
pe’cui si ricogghie Susu;
pe’ cui accatta medicini,
la mentimu alla Caria,
‘ntra lu largu, faccimprunti,
duve c'è la farmacia!
Stì cannali a mu funzionanu
jomo e notte de continu,
de lu primu, cuminciandu,
ammu scurre sempe vinu;
lu secundu poe gazzosa,
ca c’è cui lu vò 'mbiscatu
e cui tene, pe’ natura,
lu stentinu dilicatu;
e lu terzo scurre birra,
speciarmente ‘ntra la stati,
quandu li turisti arrivanu
strapazzati e scudijati;
e lu quartu jetta wischi,
pe’ cui vade a lu cantere
e s’ammussa a lu cannali,
si no vole lu bicchere;
e pe’ cui sì leva presto,
ca mu parte pe’ lu vosco,
c’è lu quintu riservatu,
duve scurre “Anici Bosco”;
e lu sesto Rum e Poncio,
speciarmente quandu
‘mberna,
ma, duranti la stagione,
scurre sulu “Amaru Averna”!
Chisti cose vi promento:
no fatiga, cu strapazzi,
ma, si poe nò mi votati,
vi mbiviti certe cazzi!