La Barcunata 28
Ddududdù, ddudduddù, cu’ è?
Sugn’eo, su lu cumpare!
Passai de ccà pe’ casu:
vi pozzo salutare?
“Oh, sì: bonovenutu,
trasìti, accummudativi,
supa de stu divanu,
prego, cumpà, assettàtivi!”.
Grazi, cummare, grazi;
vui siti assai gentili,
ancora vui parìti
rosa frisca d’aprili!
“Grazi, cumpare, grazi
de chistu cumprimento,
ma ccà cui vi minàu,
dicìti, quale vento?”
Sapìti: chista notte
fice nu sonno stranu,
mi parze ch’ere proprio
sedùtu a stu divanu;
vui tutta premurusa,
dicistivu: ccà c’è
pronta, si la voliti,
na tazza de cafè!
E doppo mi dicistivu:
oje mangiati ccà,
pronta è la pasta chjna,
pronto lu baccalà!
E poe, mu discurrimu,
appena chi mangiàmme,
como dui ‘nnammurati
vicini n’assettamme
e tuttu virgognusu
v’accarizzai lu petto
e vui, cu nu surrisu:
megghio supa lu letto!
A sta provocazione,
cu garbu, la cummare,
senza pe’ mu l’offende
rispunde a lu cumpare:
“Quantu vui vi nsonnastivu
rispunde a verità,
ma pe’ lu jire a letto
lu sonno ‘ncigna ccà!”.