La Barcunata 8
Tragica notte: Sussurtàu la terra,
curcandu casi, chiese e munumenti;
parìa ca ‘mpuria n ‘atra nova guerra,
sutta lu ‘mpemo de bumbardamenti!
E si scupàu de l’Umbria li paisi
corno Folignu, Serravalli e Assisi!
Perciò si mosse la magistratura
supa de stu disastru pe’ mu ndaga,
mu pizzica lu reu de sta sciagura,
cu la cundanna a morte pe’ mu paga;
ma surda e muta è ccà tutta la gente
e fade finta ca nò sape nente!
Ed ecco, nesce fora lu pentitu,
onuri de l’Italia, groria e vantu!
e Samprenciscu vinne già ‘nquisitu
(non èpperu rispetto de lu Mantu!)
e pe’ cinc’uri vinne nterrugatu,
sutta lu torchio de nu magistratu!
Disse lu magistratu: “Duve jisti?
chija nottata, duve la passasti?
Pecchì la terra tua nò proteggisti?
Pecchì la chiese tua nò la sarvasti?”
Mo chi Frenciscu è misu ntra li guai,
diciti, cu lu tira fora mai?
Lu Papa nò, ca sinde jìu a la festa,
mu vide li papatuli a Bologna,
e Prode ave atri cazzi pe’ la testa,
si spagna nò mu perde la mangiogna,
e li viscuvi cu li cardinari
vannu duve c’è adduru de dinari!
E mò Frenciscu meo, si’ ruvinatu
Pe’ li pisanti accusi e l’aggravanti,
non ài, mu ti difende, n’abbucatu,
ca chistu vole liquidi e cuntanti.
Tu li ricchizzi li spartisti a tutti
e mò vai carceratu e Ti strafutti!