La Barcunata 30
Mi ricordo ca la notte
de lu cincu de jennaru,
s’aspettava la befana
cu nu saccu curmu paru,
e portava tanti done
alli figghj li cchiù bone!
Pe’ mu mpendo la cozetta,
mu mi curcu presto jia
e cercava, no’ mu dormo,
la befana si venìa:
cchiù guardava, cchiù arricchjava
la befana addimurava!
Pe’ mu staju rivigghjanti,
mi votava e mi girava
ntra lu letto, pe’ mu viju,
la befana si arrivava.
Però avogghja mu l’aspetto
no’ venìa pe’ meo dispetto!
Ogni scrusciu chi sentìa,
ogni alitu de vento,
la pagura mi venìa
e schjantava de spavento,
e lu sonno, a nù momento,
m’afferrava a tradimento!
Ma nu brividu de friddu,
chi de fora avìa trasutu,
mi rivigghja: oh la cozetta!
La Befana avìa venutu!
Pe’ lu prejo pigghju e juntu
li rigali pemmu cuntu!
Guarda e guarda: cincu ascadi,
cincu sorde, cincu nuci,
dui cundragghji, dui castagni
e nu portogallu duci.
Chisti erenu li done
pe’ li figghji li cchiù bone.
Mo’ no’ c’è cchiù la befana
pemmu porta li rigali;
pe’ sti giuveni viziati
vene ormai Babbu Natali,
cu la varva e lu mustazzu
c’assimigghja a nu pupazzu!
E chi porta? Motorini,
majurana, cocaina
e veglione ‘n’ discoteca,
spesso tragica e assassina:
e na mamma sventurata,
‘mbanu aspetta la tornata!