La Barcunata 26
Cchiù supa de Ddorìcu,
a destra de la strata,
c’era na Cona antica
na vota venerata
La notte d’ogni sàbatu
(nànnama mi cuntava)
na Fata “a pede scazu”
mu prega ccà arrivava!
‘Mpatti, supa na petra,
c’èrenu dui pedàti
de na figghjòla scaza
cu cincu jijitàti;
e, avanti de la Cona,
nu massu si trovava
cu fundi dinocchjàti,
signu ca ccà pregava;
e supa nu macignu
c’eranu dui cciampàti
de mula o de cavallu
de zzòccola ‘mperràti!
Ma mancu na perzùna
vidìre mai la potte,
pecchì venìa ‘n’silenzio
verzo la menzannotte.
E mentre chi pregava,
partìa de lu Scarmìu,
mu duna lu signali
mu canta lu scropìu (l’assiolo).
Ed eranu li note,
na trama de sugghjùtti,
como volesse dire:
“stacìti cittu tutti!”.
Chistu cuntàva nànnama
(e como nci cridìa!)
‘mpatti li ‘mprunti c’eranu
e ognunu li vidìa!
Era nu “Martingala”
e bella la jornàta
cu li cumpagni jhivi
mu fazzu la “scialàta”.
Scegghjmme como loco
li petre de la Cona,
pecchì c’era vicinu
na funti d’acqua bona.
Junti supa lu posto,
la vista fu attirata
de li famusi ‘mprunti
dassàti de la Fata.
E mentre chi guardàvamu,
cu l’ànimi suspisi,
la fantasia volava
pe’ magici paisi,
duve casteja c’èranu
de notte alluminati,
jardìni e funti duve
regnàvanu li Fati!
Certo ca a chija etati,
cui mai potìa penzare
ca l’acqua cu lu vento
massi ponno scavare,
como na mani sperta
chi mente tanta cura,
mu po’ portare a tèrmini
n’opera de scurtura!
E mo’ chi sugnu vecchio,
vicinu a la tumbàta,
cui sa, si nci su ancora
li ‘mprunti de la Fata?
E vui c’avìti figghj,
cuntàti sti faràguli
cu l’anima mu li pìgghjanu
pe’ vere chisti fàvuli;
pecchì la vita umana
è tutta nu mistero,
na fàvula chi passa,
nu sonno, nu dittèro,
chi cu’ n’amaru chjantu,
mi porto ‘n’campusantu!