La Barcunata 37
Tra li tanti cuntentizzi,
chi tenimu a stu paisi,
sugnu certo li satizzi,
si a chilometri su ‘mpisi,
ma la cosa cchju preggiata
è però la soppressata!
L’atru jorno si ‘mbitàru
alla casa certe amici;
no’ vi dicu chi mangiaru,
no’ dassaru olivi e alici!
Unu disse, a vuci ata:
mo’ nci vo’ na soppressata!
Già seduti a tavulinu,
senza brocche e senza piatti,
duve c’era pane e vinu,
quattru amici suddispatti,
ca la tavula conzata
l’adornàu na soppressata!
Nu cumpare meo ‘mbitài:
pasta a furnu, piscispata,
carne e casu nci passai,
cu cuntorno de ‘nsalata;
ma la cosa cchiù apprezzata
fu però la soppressata!
L’atra sira fui ‘mbitatu
alla casa de n’amicu:
lu crapetto avìa ‘mpurnatu,
de brascjole no’ vi dicu!
Ma mu conza la sirata
nci volìu la soppressata!
Mi ricordo, l’atru misi,
Micu quantu avìa mangiatu!
Mi parìa de nove misi,
a tamburru era conzatu!
Si votàu, poe, alla canàta:
porta ccà na soppressata!
Lu zzu ‘Ntone avìa na figghja,
alli sami la mandàu;
succedìu nu parapigghja,
proprio nente cumbinàu!
Ma la figghja mu è approvata,
rigalàu la soppressata!
Pe’ m’ottegno nu progetto,
mi dannài, no’ sacciu quantu!
sette ott’anni eppe m’aspetto,
alla fini ere già stancu!
Ma la carta fu firmata,
ca portài la soppressata!
Certe cose no’ criditi
e perciò, dicu: provàti!
Ammazzativi du’ porce
e facìti soppressati:
e dormiti poe squitàti
‘mparadisu puru jati!