La Barcunata 11
A Vui, potenti e ‘llustri deputati,
chi cirivejo a tumena teniti,
e siti pronti a tutti li chiamati
e a li bisogni puru pronti siti:
este nu fattu assai straordinariu,
mu mi cacciati de lu calandariu!
Ma chistu è giustu, ca l’Italia abballa
A menzo a la rovina de la crisi,
cu nu jorno de cchiù, si tene a galla
la barca chi va a fundu a stu Paisi:
e cu nu jorno de vacanza ‘n meno
stade suspisa pe’ vint’anni armeno!
No’ minde ‘mporta ch’è jorno feriali
Lu jorno meo, chi prima era festivu;
datu ch’è pe’ lu bene nazionali,
vi juru, ca no’ su’ mancu currivu:
si de lu calendariu mi cassaru
quant’atri Santi a caci currijaru!
Ma mo’ chi minde scindu ntra lu mundu,
vogghio mu fazzu banchi como a tandu;
vogghio mu viju quantu sciocco e tundu,
e vogghio puru mu mi raccumandu:
pecchì, si scindu, tegno l’intenzione
mu pigghiu de vecchiaja la pensione!
Lu sacciu ca m’aspetto pe’ tant’anni,
m’arriva lu libretto de pensione;
la legge no’ si cura de l’affanni
de la vecchiaja o mali condizione;
mo’ chi c’è meno feste e cchiù ‘mpegati,
decianni e chiù ci vo pe li misati!
Doppo chi pigghiu l’arretrati e paga,
e viju la sarvezza de la Patria,
chist’anima, pe’ sempe mu s’appaga,
vole a l’eterna sede mu rimpatria:
no’ cu Cristu e Maria, ma cu li morte,
ch’èpperu como a mia la stessa sorte!
E poe chi giaciu ntra lu cimitero,
vogghio mu prego pe’ li deputati,
‘nsamai, pe’ mu si sbila lu mistero
de scandali e de ‘mbrogghj combinati:
tipu li bustarelle lockeddiani,
pe’ cui pagami tassi l’Italiani!