La Barcunata 10
De Darwin tornau la teurìa
secundu cui l’omo è de lu rango
de la scimmia ed essere porrìa
figghiu diretto de lu rangutangu.
O puramente de lu scimpanzè
chi de tutta la razza este lu rre.
E secundu sta nova terìa
nci fu n’antica scimmia ntilligente
chi òmeni e no’ scimmi parturia
chi originaru poe tutti li gente:
pecchissu ringraziati sti nimali
chi vi dunaru nobili natali.
E predicati puru apertamente
(scusati la mia povera gnuranza)
Ca l’omo de la scimmia è discendente,
pe’ bia c’è na certa simigghianza.
Mbiatu vui, chi assimigghiati tantu
a chista bestia e nde faciti vantu!
Ma pecchì de na scimmia ‘mpertinente
nui simu discendente tutti quanti
e no’ la scimmia poco ntelligente
figghia de n’omo stupidu e gnuranti?
Vui de l’elenco cancellati a mia
ca mi nde futtu de sa teoria.