La Barcunata 19
Cu lu sorrisu solito
stupidu e strafuttente
parràu ‘n televisione
lu nostro Presidente:
“Lu popolo talianu
è troppo grosso e grassu,
però la medicina
è pronta mu lu sgrassu.
Lu fazzu a trenta jorne
de pisu pe’mu scinde
armeno dece chili
e strafuttitivinde!
Li tassi sugnu pronte,
vonno sulu varati
viditi a menzonente,
corno vi nde calati!
V’adduppricamme l’ICI,
doppo chi a lu Catastu,
vene aggiornata e poe
si fa n’atru rimpastu.
Quand’unu va e si curca,
va pe’ mu si rilassa,
ma quandu si rivigghia:
tirittuppiti natra tassa.
Pe’ chissu vi cunsigghiu
poco pe’ mu mangiati,
basta na vota tantu
pe’ mu vi sbudejati.
Si bui mangiati poco,
perditi tanti chili,
lu corpo proteggiti
e godagnati stili!
Pe’ mu s’ottene chistu,
currimme a li ripari,
lu culu vi mbujamu
cu grosse vijozzari!
Cu sta cuscenza lasca
vi scotola la tasca”.