WIP

Menu

La manovra finanziaria

di Francesco Mazzè

La Barcunata 34

E s’assembràru tutti quanti all’arva:

tecnici a lu cuverno e deputati,

mu cercanu l’Italia mu si sarva,

ca simu de li dèbbita orvicati:
 

su dui miglione e rutti de migliardi

cchiu assai de quantu a mari ci su sardi!

 

Ed ecco quandu tuttu fu approvatu:

lu mensili de li parlamentari

a quasi tri miglione fu vasciàtu

(si sàrvanu accussì tanti dinari!)

 

e d’abbulìre vinne stipulatu

li portaborse e machini de statu!
 

E doppo discussione, tutti uniti

cacciàru la presenza e decretaru:

nente finanziamente a li partiti

e a sindacati chi ni rovinàru:
 

e a li guappuni de li tri canali

mu pìgghianu no’cchiù de nu statali!

 

E stabilìru ancora a li latruni,

ch’arrobbàru muntagni de dinari,

mu sequestranu villi e palazzuni,

mu li spògghianu nudi pari pari
 

e mu tòrnanu viatu chisti stesse

quantu arrobbàru e sparti l’interesse!
 

Pe’ mu vènenu ‘ncuntru a l’operaiu,

e a cui pigghia dui sorde de pinsione,

scalàru, a partire de ntra Maju,

ogni genere d’alimentazione,
 

la luci, lu gasolio e la benzina,

lu metànu e lu gassu de cucina.
 

E li tassi mu paga cui godagna

e cui possède e no’ pagàu mai nente,

ca pe’ lu “futti-futti” e “magna-magna”

pagàmme sempe nui, povera gente!
 

Perciò tranquilli tutti stamuninde:

l’Italia è sarva e strafuttimuninde!

 

A chistu puntu ntise na bottazza

e juntu all’ariu, pe’ lu gran spavento;

mi parze ca venìa de ntra la chiazza,

la chiazza duve c’è lu Monumento;
 

e mi rivìgghju e all’attimu pensài

sulu stu sonno no’ s’abbèra mai!

Altri poesie di Francesco Mazzè

La funtana de la Chiazza

Allu paisi meo

La chjesola de campagna

Cantu de l’emigratu

Cumbitu all'italiana

Mastriccu

La terza lista

Lu terremoto 'n' Umbria

Muntimarejo

Adamu

Micu Iozzo

Darwinismo

Visita Medica

Tecco e Donna Stella

Li dui turri

Tridicesima dumila

Lettera a San Giuseppe

La Barcunata

Lu ‘mperno no’ c’è cchiu’

Lu Papa a Damascu

La Funtana de la Chiazza

Allergia

La Vilanza

Sarvamu la fami

Scuperte moderne

Autodifesa

Mmprevisti

La Giostra

La mugghiere incinta

La bulletta de l’ICI

Lu consigghiu de Prodi

Prodi e lu deficit

Paru e disparu

Lu ‘ncendio

Lu scioperu

Grazi gara

La Discuteca

Risistenza

La Fata de Ddorìcu

A Domenico Franzè

Lu Partu gemellaru

Lu pane de na vota

Lu sonno de lu cumpare

La Funtana de la chiazza

Sarvamu la fami

La Befana

La manovra finanziaria

La Suppressata

Lu doluri de na vedova

Lu ricattu

Notte d'estati

Ringraziamento