La Barcunata 3
Eranu tutti quanti asseggettati:
ministri, deputati e senaturi
attorno a certe tavoli conzati
e, a menzo a chisti, c'era poe nu gnuri:
criju lu capu de Li cummensali,
nu vecchio jumbarusu cu l'occhiali!
Chistu pigghiau nu libru e nei lejìu
nu passu de Vangelo in latinoro;
poe cu la destra li benedicìu
e tutti quanti cominciaru ‘n ‘coro:
“Secundu magna misericordia tua,
secundu magna mea, secundu sua!”
Poe spezzandu lu pane cu li mani,
disse inchiendo li calici de vinu:
“Lu corpo è chistu de tutti li Taliani
e lu sangu sucati de cuntinu!”
Poe chiuse, cu riguardu, lu libretto
e forte ognuno si pistau lu pettu!
Oh, chi grazia de Deo, chi bene c’ era
Pe’ supa a chiji tavuli conzati:
li piatti chjni ed ogni ‘nzalatera
vini pregiati de tutti li cuntrati,
cosce de capra arrustu e de capretto,
agnejo a furnu e denta de filetto!
E chi vidisti ccà, li cummensali
si scatinaru pe’ “l’arrappa-arrappa!”
Parìa n’atru judizziu niverzali,
cui nd’acchiappava cchju volìa m’acchiappa;
tantu chi a nu dittu e a nu fattu,
no’ c’era mancu n’osso ‘ntra lu piattu!
Tutti s’annammuraru de stu ritu
e la fuja crìscia jorno pe’ jorno;
vidivi gente nova a stu cunvitu,
cu facci de magara senza scorno;
e c’era De Lorenzo e lu soe amicu
Craxi, Poggiolinu e Ciarrapicu!
No’ vinde cuntu cchju, ca mi ‘ncrapicciu,
casu tanti sti figghj de pputtana,
decuntare, diciti, quandu spicciu,
ca criscenu ogni jorno e ogni simana.
Chi cu lu sarmu de’ -secundu magna-
Ficeru de l'Italia na cuccagna!
Ma ‘ntra Lu megghio de lu “magna-magna”
nesce fora nu malu guastafeste,
De Petro, mu ci ruppe lu timpagnu
e mu li conza a tutti pe’ li feste
e sparti, a mu ci sciuppa a sti latruna
li mutanti, cu tutti li buttuna!