La Barcunata 15
La mente non ha limiti
pe’ lu progresso umanu,
no’ nde rigetta n’attimu,
mu va sempe luntanu!
Ma l’urtimi scuperte
criaru malumuri,
ca la natura ‘nsurtanu,
li Santi e lu Signuri!
Na fimmena chi attrippa,
no’ ‘mbole pe’ mu figghja
scappa a la farmacia,
s’accatta na pastigghja
de la matina appresso
o de lu jorno avanti,
sicura ca la panza
resta liscia e vacanti!
Oppuru nci ‘nd’ è n’atra,
perfeda e galiotta,
‘mbelena la creatura
e poe la jetta morta
o va a nu spitali,
duve, naturalmente,
(attrippanu li ciucci)
e paga lu nucente!
Ma nc’è cu’ vo’ m’è mamma,
ca sente la natura,
va ja nu specialista,
si mente sutta cura
e, doppo nove misi,
puro m’ha settantanni,
fa quattro o cincu figghj,
senza mu pate danni.
Si chisti no’ funzionanu,
c’è ancora na trovata:
si fa prestare l’utero
e dorme poe squitata.
Ma poe nc’è nu problema,
anzi surge nu dramma,
la figghja, quandu crisce,
a cu’ a mu chiama mamma?
Na mandra non à zimmaru?
Quale preoccupazione!
Li crapi si raddoppianu,
grazi alla cronazione!
Ma si figghja la pecora,
senza de lu muntuni,
ancora no’ trovaru
mu ‘mprena lu ricchiuni.
Ma cu lu tempo, criju,
anzi sugnu sicuro,
chi corchi machinetta
la scienza mbenta puro
mu tocche nu buttuni
e figghja lu ricchjuni!