La Barcunata 21
Sbampàu lu Meridione
e, tutti acciarricati,
nchianavanu a lu celo
li fiammi a nivulati!
Li vosche, a la muntagna,
como milli carcari,
vrusciavanu, agghiuttendo
arvuri centennari!
Chistu judizzu ardente
parìu nu ‘mperno vivu,
no’ trovo li palore
pe’ mu vi lu descrivu,
tantu m’appaguravanu
li vampi culassali,
c’attizzanu parìa
li diavuli mpernali!
Menza de la Campania,
Puglia, Basilicata,
Calabria e la Sicilia
mo sugnu cinnerata!
E chi fini fice
lu nostro pecuraru?
S’è pecuraru jiu
mu mente a lu riparu
li pecure a sicuru
de sti lingui de foco,
chi notte e jorno agghiùttenu
foreste a poco a poco!
Pe’ mu cumpreta l’opera,
chi è a la curmatura,
mancava lu ‘ntervento
de la Magistratura!
‘Mpatti li sei ‘nciandiari,
chi furu pizzicati
cu latti de benzina,
vinneru liberati!
E Prode, chi no’ mbide
como nu scemo ride.