La Barcunata 2
Ti salutu amata mia funtana,
salutu amici, chiese, strati e chiazza
partu pe’ n’atra terra assai luntana
cu la speranza sulu de sti vrazza!
Eo partu e vaju ‘n’ cerca de fortuna,
oltre lu mari sempe amareggiatu,
duve c’è n’atru suli e n’atra luna,
duve mi sento tristi e disperatu!
Eo partu pe’ nu mundu scanusciutu,
pecchì de lu cuverno fui ngannatu;
verzo nu regno pe’ mìa surdu e mutu,
duve po’ jire sulu l’emigratu!
Abbrazzami, Marì, mu ti salutu:
lu figghiu ca mu nesce raccumandu;
minde vaju pe’ poveru e sperdutu,
ma li suspiri mei sempe ti mandu!
E, quandu nesce, fàmmilu cristianu,
mu crisce bello como lu Bombinu,
‘ccussì lu patre soe, tantu luntanu,
lu sente, cu lu core, assai vicinu!
E si no’ torno cchiù, mancu li cane,
ca st’anima a lu Celo sind’abbola,
dinci ca jivi pe’ m’abbuscu pane,
la Madonna, Marì, mu ti cunsola!