La Barcunata 29
La funtana de la Chiazza,
chi funtana, chi acqua pura! ...
astutava la calura
d'ogni specie e d'ogni razza:
la funtana de la Chiazza!
Ccà mbivìa lu forestere,
ccà mbivìa lu paisanu;
lu vicinu e lu luntanu
s'appojava a su bivere:
paesanu e forestere!
Quantu voti ccà venìa
cu na scusa la cotrara,
lu varrili o la cortara
e la vozza parìnchìa:
la cotrara ccà venìa!...
Quantu voti su cannali
rifriscava jorno e notte;
bene fice quantu potte
cu chiss'acqua naturali:
quantu bene su cannali!
Verzu sira (ti rammenti?),
si venìa la cara amanti,
tu ntrizzavi li toi canti,
eo cuntava li momenti:
oh, chi gioia, oh, chi turmenti!
Mi ricordo, a menzannotte,
s'ero ancora rivigghianti,
crocchijavi jocavanti
sula sula ntra la notte:
chi suspiri a menzannotte!
Poi fu fattu lu cunduttu,
l'acqua 'n' casa fu portata;
mò si bona pè mbarrata,
lu bivere tuttu ruttu:
chi disatru lu cunduttu!
Mò si vecchia e si malata,
non astuti cchiù l'arzura,
como tandu, od ogni ura,
e de tutti si scordata:
ca si vecchia e si malata!
Propio propio m'assimigghj
a na cara amica mia,
chi pigghiàu na malatia
cu li manichi e manigghj
e chi mò non è toccabili
como tu non si potabili!...