La Barcunata 43
“ ‘Mo sugnu ‘cca’ ma vegn’i ‘n’atru mundu..”
Addaccussì si prisentau alla ‘ggenti!
Vijatu, chiju ‘ncuntru ‘cu lu mundu,
‘u fici ‘u ‘nchjana ‘ncelu ammenz’a’nenti!
‘Ndi dissi – Bonasira – e ja’ quetau!
Restammu tutti comu ‘nzallanuti
Li mani ‘nci sbattimmu e s’a scialau
E l’occhji soi, si ficiaru vagnati!
‘Nt’a n’attimu ‘nci fu com’a ‘n’a scossa;
‘Nu terramotu cumpundiu li menti;
chij’omu fu la manu d’a riscossa,
‘mu cangia ‘nt’a la terra ‘i sintimenti!
Iju ‘nchjanau l’arrama ‘cchjù ‘mportanti,
di n’arburu chi già stacìa siccandu;
‘ncignau ‘mu faci cosi stravorgenti,
‘cu la ‘ntenzioni pemm’u sarba ‘u mundu!
No’ssu’ ‘cchjù sbenturat’i povareji
Pecchì trovaru a ‘n’atru sanfranciscu
Non ‘ann’i jiri comu pecureji
Pemmu ‘ashjanu ‘nu poch’i pani friscu;
Si Mastru Brunu ‘u vidarrìa d’u’mpernu,
si sentarria cuntentu ed appagatu,
e, ‘a littara chi fici “Oh! Pateternu”,
la sciancarria, scordandu lu passatu,
pecchì ‘stu Papa, chi vinn’i l’atru Mundu,
‘ncignau ‘mu faci ‘bbona pulizzia;
voli ‘mu vaci ‘nziccu,’nziccu e ‘mpundu;
‘mu sarba di lu mali ‘a Sacrastia.
Spiritu Santu, Tu chi ‘nd’u mandasti,
danci ‘na manu ‘nomm’u si ripenti;
fanci ‘mu fa li cosi chi ‘nci’cisti,
‘mu fa tornari “ ‘U Cristu” fra l’aggenti!