La Barcunata 55
Tutti li voti chi j’ a ‘ssubba ‘nchianu
pemm’u ‘nci portu’ a patrima ‘nu shjuri,
vaju girandu stancu, chjanu, chjianu
pè chiji rughi ‘ntrisi di doluri!
Alla ‘ntrasatta, viju facci novi;
e ‘u cori nesci quasi di lu pettu!
Non sempi ‘ncuntri chiji ‘c’ ài ‘mu trovi
e giri, giri senza m’ài riggettu!
Stranamenti chi ‘chjanava verz’ a cruci,
li tumuli parenu virdi prati!
Lejia subb’ e tuselli casi duci,
signu ch’ eranu tutti cunsacrati!
Subba d’ a cruci, manc’ a centu metri,
‘nc’ era ‘nu bustu di tant’ anni fa,
tuttu saracijatu, chjinu ìi petri,
‘nta la mia menti dissi: Cu ‘nc’ è’ cca?
Doppu chi ‘m’ addunai chi ‘nc’ era scrittu,
pe pocu no ‘mmi vinni ‘nu malannu!
Lu shjatu mi mancau pe lu dispettu
e poi, mi ‘ntisi cogghjari d’ affannu!
Sentiti tutti oh! Cristijani mei
ja’ sutta ‘nc’ era ‘n’ omu tantu ransi
chi si pot’ assettari ‘cu li Dei,
tantu chi jera rande tra li randi!
Lu nomu soi? È semprici, ‘v’u dicu:
Vincenzu, si chiamava! Era Ammirà!
Pè ‘’mia fu sempi lu ‘cchjù meggghhj’ amicu,
lu verzu soi, mi dezzi libertà!
Comu ti rinduciru Patri mio!
Tu chi mi desti la palora fina,
si abbandunat’ a comu voli ‘dddio!
Lu toi tusell’ è peju’i ‘na latrina!
Pecchì lu toi pajsi a’ ttia ‘cchjù caru,
no’ tti rispetta ‘cchjù com’ a ‘na vota,
quandu ti ricogghjiv’a lu pagghjaru,
cantandu ‘cu’ ll’ amici la chjanota!?
Eppuru lu toi nom’ era ‘mportanti!
Comu cantavi tu, ‘cu li toi verzi,
di chiji tempi nuju aviv’ avanti,
di chiju stampu, ormai, tuttu si perzi!
Oh! Pajisani mei chi cumandati,
cercati ‘mu sarbati’ armen’ a facci!
Lu randi Vati, no’ ll’ abbandunati,
‘sti cosi ‘mpam’ i fannu sul’ i pacci!