La Barcunata 33
‘Nt’a na naca fatta ‘i canna
nu figghjiolu beju sta!
A lu shjancu ‘nc’è la mamma
chi ‘nci fa la ninnanà
Veni sonnu, veni sonnu
sonnu veni, veni ‘ccà!
Porta l’angiali a lu tornu
ca stu figghjiu hai di gabbà!
Fallu jiri ‘ntr’a nu mundu
tuttu fattu di culuri;
fanci fari ‘u girutundu
fanci scòpriri l’amuri!
Veni sonnu, veni sonnu
sonnu veni, veni ‘ccà!
Porta l’angiali a lu tornu
ca stu figghjiu hai di gabbà!
La sua vita di ‘nnocenti,
havi d’essari ‘ntessuta
no’ di peni e di lamenti,
ma di ‘mbarzamu ‘mbivuta!
Veni sonnu, veni sonnu
sonnu veni, veni ‘ccà!
Porta l’angiali a lu tornu
ca stu figghjiu hai di gabbà!
Porta l’angiali a lu tornu
danci la felicità!