La Barcunata 6
Si lu tempo este bono,
chi vorria mu sugnu joco,
mu mi scialu tuttu quantu
e mu nesciu de stu foco.
Si faciti la nottata
E de mia vi ricordati,
na preghera e nente cchiui
quantu pemmu su cu vui.
Lu mperno non è chiju
como Dante lu descriviu,
ma este de sicuru chistu
e Colombo lu scopriu.
Eo vorria pemmu la sciogghio
la catina de stu pede,
a S. Nicola pemmu torno
e mu vivu como aere.
De lu vosco a la muntagna
la manicula useria
e la vita vorria mu fazzu
tale e quale como attia.
Joco nc’è spenseratezza,
alla terra tua natìa,
e non c’este la tristezza
d’emigrati como a mia.
Piazza Crissa è nu pretorio,
ma li giudici ed abbucati
sugnu ngiru pell’Italia,
gente dotta e gran scenziati.
Su cchiù belle a S. Nicola
li dui misi Lugliu e Agustu,
doppo tutti si nde vannu,
perù chistu non è giustu.
Potighanti in rovina
lu mercatu poe si allarga,
non è certo como prima
chi sembrava na battaglia.
Lu sipariu cala triste
e rimane tantu voto,
ma la recita ripigghia
puntuali l’annu dopo.
Ere bello tu na vota,
ch’ere a festa tuttu l’annu,
mo l’amici li cchiù cari
ci balici si nde vannu.