La Barcunata 12
O Paisani nicolisi
ed amici cca venuti,
ppe amicizia e cortesia,
oje è festa di nui tutti
chi nescimmu ‘ntra sti timpi,
ppa raggiuni ca penzandu
comu a crita ch’u Signori
impiegau ppe mu nd’imposta
risurtau di marca bona.
Pecchì vene naturali
mu si fannu certi cunti
domandandu ‘n conseguenza:
e pecchì stu fattu stranu
s’era crita ricogghiuta
‘n menzu a petre e rini arsi
cu cuntomu di l’ardichi
e d’i spini cchiu pungenti?
A risposta è prestu ditta
o Paisani di sta terra:
ca la vita di nui tutti,
propriu a cuntu di sti fatti
fu na vita senza vezzi,
ca nu tutti ndi criscimmu
‘zzarijiati comu i zappi,
c’u cervejiu sempe all’erta
mu si vince lu destinu
di na terra dura e avara.
Maravigghia, allora, amici,
si marciandu sempe onesti
fummu tutti forti e lesti.
O studenti o deputati,
o medici o avvocati,
o sordati o generali,
o mbastari o mastri d’ascia,
muraturi o carvunari,
contadini o custureri:
faticandu senza posa
mu trovamu nu cantuni
mu campamu dignitosi,
tantu ccà dintr’a sti casi
‘mpenduti supra i timpi,
tantu jiendu mundu mundu
alla cerca di fatica.
È pecchissu ch’u Signuri
chi non sbagghia e vide giustu
a nui fice ppe regalu
miraculu mu criscimu
spini e ardichi abbiverati
cu suduri e cu fatichi,
per incantu gigghi e rose.
Ed allora, Amici cari
Chi cca ojie vui onorandu
nu paisanu comu a mia
chi ppe meritu divinu
eppe u donu d’a “poesia”
ONORATE TUTTI VUI.
Ed iu apposta vi su gratu
ca pp’amuri di Voi tutti
oie scrisse a megghiu strofa
d’a mia vita di poeta.