La Barcunata 51
Puru Mama a facia…
Quandu cominciava a novina
E chirjiu Santu Viscuvu de Mira
Mienzu cuoppulu de ranu
A muorjiu irjia mentia
Na manata de’ ‘ndianu puru hjiungia
E na viriozza tandu scurciulata
Na cummara vicina apposta ‘nci l’avia dunata.
Pe’ tutta la durata da novina
L’acqua cangiava ogni matina
Hjia ma pigghjia frisca o Cenzulieri
Ca cofinerjia chjina e vozzarieri
‘nchjianava da ‘mpetrata do Monastieri
Portandusi ‘ntra la mienti li pensieri.
Arriva u jiuornu mu si cocia u ranu
Era a vijila e chirjiu Santu amatu
‘ntra na tighierjia e Crita bella randa
U frumentu mentia bellu annettatu
Avanti a vuccatura de lu furnu
Nu tripuodu raffermatu sistemava
E de ‘supa cu ‘tanta fede la posava.
Subitu u luci appiccicava
Cu tri corvini stuorti de bruvera
A hjiancu mentia puru na pignata
Pemmu caddijia l’acqua de’ jiungira
u fuocu mantenia vasciu vasciu
Pemmu si cocia u ranu chjianu chjianu.
Quandu l’acqua misa era siccata
Atra cadda ‘nda hjiungia da pignata
Dopu nu paru d’uri e pippijiara
Dopu tanti manijiati ca ‘cucchiara
Cominciava mu si forma na cremina
Era do ranu u hjiuri da farina.
Prima pemmu u caccia e supa o luci
Facia natru assaggiu ca cucchiara
Volia ancora verificara
Si de’ sala era bona o era duci.
All’urtimu ‘ntro centru da tigherjia
Nu bellu signu e cruci nci facia
E supa o tavulu a mentia.
Dopu convocava la famigghjia e dicia
“A porgia pe’ stasira non si tocca”
Stanotta passa Santu Nicola u fa la prova
Ava u cunferma puru e Sant’Andria la nova.
A matina priestu ‘ncuriusiti
Erumu ‘ntuornu o tavulu quieti quieti
Mama scoperchiava la tigherjia
‘ncera na bella fossa de nu’ latu
Avia passatu e vieru u Santu amatu
O nu surici notturnu avia mangiatu?
Mo dicimu nu Gloria Patri a lu Messia
E mangiamuni a devozioni la porgia.
Venia pua spartuta a tuttu u vicinatu
E chirjia chi restava
Finu a ‘Mmaculata si mangiava.
Chi devozioni! Mo’ i tiempi su cangiati
Quanta gramigna ‘ncesta pe’ li strati
Simu caduti ‘nterra cu lu mussu
Non si gugghjia ‘nchjiuna ranu a Munturussu
Anzi no ancora u gugghia Cicciu Maiu.