La Barcunata 43
Ogni tantu mi viani ncia mianti
bella, ata,eleganti e ’mponianti;
quntu voria u n’assettamu
e tuttu e de tutti u parramu.
Tu ca pe seculi a Capistanu vivisti
voria u mi cunti chi vidisti e sentisti,
nenta scrittu o a vuci dassasti
seculi e storia cu tia ti portasti.
Io veramenti fhuda sempa nu puacu virgognusu
ma urtimamenti no tiagnu mai u mussu chiusu.
Puru io l’aghiu longa a memoria
ma a mia e’ tutta ’n’atra storia.
No ’nc’e’ arvuru chi si provai no ’nchianai
a tia sempa ti guardai ma mai m’arrizzicai
tanti vuati ncia mianti parrava chianu chianu
forse quandu crisciu ncia fhazzu u ti ’nchianu.
A vuati mi domandu si sula ti sentivi
e cuamu l’atri arvuri ’nchianata volivi
ma tu u sai ca a curpa no fuda a mia
iari truappu ata e io l’ali no l’avia.
Cu i vrazza paria ca u cialu toccavi
a chiji passari e mamma nci fhacivi
cantandu cantandu paria ca mi sputtianu
volanduti ’ntuarnu a modu sua mi dicianu.
A vogghia ca ti sputi i mani
cca’ no si capaci u ’nchiani
pua ’nchianara ogni castagnara e livara
ma non e’ cosa tua u ’nchiani a PIGNARA.
Fhusti a cchiu’ anziana,a cchiu’ bella e cchiu’ ata
ma e certa gianti e Capistanu no fusti mai calculata
nce libri e tuttu e de tutti scrissaru
ma e tia mancu na menza parola dissaru.
Ma no serva ca ta cuntu io a storia
a canusci cchiu’ e tutti a mimoria
nui simu puacu calculati
si simu vasci o simu ati.
Tu i canuscisti propiu tutti
buani, mali, belli e brutti
no ti dedicaru mancu na via
e cangiaru puru chijia mia.
Tu ca ’nziami a Santa fusti regina
ti rivigghiasti chijia tristi matina
nujiu u ti difende si presentau
puru l’amministraziuni t’abandunau.
Ma tu e nenta ti lamentasti
viatu viatu tuttu capiscisti
puru a fhini tantu bene fhacisti
chiudisti l’uacchi e t’inchinasti.
A curpa non fu’ e cu ti vindiu
forse u destinu u custringiu
ma e Capistanu chi no s’appellau
e nujia atra soluziuani trovau.
Io veramenti era luntanu
cuamu tanti atri e Capistanu
era giuvani e tantu potere non avia
ma si domandavanu fhacia a parti mia.
Tu ca chianti pe tutti sentisti
poverta’ e tanti doluri vidisti
tu ca bene sempa a tutti volisti
pe tia mancu na lacrima vidisti.
Sulu chiji povari passari pe tia ciangiru
quandu a casa e a miagghiu amica perdiru
a gianti ca u spettaculu si guardau
mancu u bon viaggiu a tia augura.
Io su sicuru ca a tutti salutasti
e de Capistanu mai ti scordasti
nui u cuari debuli avimu
e sempa bene nci volimu.
Mo voria u sacciu si ssi’ luntana o vicina
ma forse ti truavi ncio’ salottu da regina
sicuru ca ti truavi ncia’ puasti ’mportanti
cu a bellezza tua l’aduarni tutti quanti.
Pajisi e citta’ assai ’nda’ girai
una cuamu a tia mai a ’ncuntrai
pe mia u mio e’ u miagghiu liattu
a tutti l’atri nci truavu difhiattu.
Mo prima ca ti salutu sianti chi ti dicu
sulu i Capistanuati mi chiamanu Micu
si pe miraculu nu jiuarnu ni ’ncuntramu
speru ca ti ricurdi e Micu e Damu.
Basta ca mi tuacchi u piadi chianu chianu
capisciu viatu ca si a PIGNARA e CAPISTANU.
U modu u parramu a modu nuastru u trovamu
e tanti nuavi e viacchi ninda cuntamu.
Mo t’abrazzu forte m’inchinu e ti salutu
tutti l’atri mi chiamnu Domenico Caputo
in casu ca no ti travi bene e vua u cangi via
ricordati ca nc’e’ sempa puastu ncia casa mia.